|
||||||||||||||
|
|
||||||||||||||
| SEHEMU YA NNE: 1970 - HADI LEO UONGIZI WA WENYEJI: MAASKOFU KOMBA, MKUDE, NA BANZI A. MHASHAMU ASKOFU MAURUS GERVAS KOMBA (1970 - 1988) Kipindi hiki kinaanza na uongozi wa Askofu Mzalende, Askofu Maurus Komba, akifuatiwa na Askofu Telesphory Mkude mwaka 1988, Askofu Anthony Banzi mwaka 1994 na kisha Askofu Thomas Kiangio mwaka 2023 |
||||||||||||||
c). Ni Nani Huyu? Tangazo la kutangazwa kwa mheshimiwa padre Maurus kuwa askofu wa Jimbo la Tanga liliwashitua watu wengi katika Tanga. Watu wengi wa Tanga wenyeji na wamisionari hawakumfahamu padre huyu. Wale wachache waliomfahamu walikuwa ni wenyeji wa mkoa wa Ruvuma waliokuwa wakifanya kazi katika mashamba ya mkonge na chai yaliyokuwa mkoani Tanga. Wakati padre Maurus Gervas Komba alipotangazwa kuwa askofu wa Tanga, alikuwa ni Naibu wa Askofu wa Jimbo la Songea liliongozwa na Mhashamu Askofu Yakobo Yafunani Komba. Nafasi hiyo ya unaibu alihama nayo toka Jimbo la Peramiho baada ya kufanya kazi kwa muda kadhaa chini ya askofu na abate mstaafu Eberhard (Hermann) Spiess, O.S.B. d). Historia Fupi ya Askofu Maurus Mheshimiwa padre Maurus Komba alikuwa mzaliwa wa Parokia ya Litembo katika Wilaya ya Mbinga. Kwa asili yeye ni wa kabila la Kimatengo, kabila linaloishi sehemu za milimani katika Wilaya ya Mbinga mkoni Ruvuma. Alifanya elimu ya msingi katika shule ya Litembo na baadaye alikwenda kufanya masomo ya sekondari kule Kigonsera kabla ya kujiunga na masomo ya falsafa na tauhidi katika Seminari Kuu ya Peramiho. Baada ya kukamilisha masomo yake hayo alipadirishwa Julai 15, 1954 na kuwa padre wa Jimbo la Peramiho. Katika miaka yake ya awali kama padre alifanya shughuli za kichungaji katika nafasi ya padre msaidizi na baadaye kama paroko katika parokia za Mbinga, Mbangamao na Mkumbi zote zikiwa katika Wilaya ya Mbinga. Baadaye aliteulikwa kuwa Naibu wa Askofu wa Jimbo la Peramiho ambalo baadaye lilibadilika kuwa Jimbo la Songea. Hivi mpaka wakati mheshimiwa padre Maurus G. Komba anateuliwa kuwa askofu wa Tanga, alikuwa amebobea katika utume wake wa kichungaji na pia akiwa na mang'amuzi mazito ya uongozi katika kanisa kwa kufanya kazi na waumini, mapadre wenyeji na wamisionari masista, mapadre, na mabruda. e). Askofu Mteule na Mapadre Wenyeji Wamisionari Toka Peramiho Historia inaonyesha kwamba askofu mteule hakuwa mgeni Tanga hivi kwani mapadre wenzake wananchi toka Jimbo la Peramiho/Songea walikwisha kuja na kufanya umisionari katika Jimbo la Tanga kabla ya ujio wake. Baba Askofu Arthurs aliwaomba mapadre hao kutoka Peramiho kuja kufanya uchungaji Jimboni Tanga kwa wananchi wengi wa mikoa ya kusini waliokuwa wakifanya kazi mkoani Tanga. Kwa makandokando haya, askofu mpya mteule alikuwa kwa kiasi hafahamiki na kwa kiasi fulani anafahamika kwa wana-Tanga. Alipofika Tanga, askofu mteule alikutana na matabaka mengi ya kijamii na kidini mazingira yaliyokuwa tofauti ya hali iliyokuwamo katika jimbo lake la nyumbani. Namba ya Wakatoliki katika Tanga ilikuwa ni ndogo sana kulinganisha na Peramiho. Namba ya mapadre na masista wamisionari na wenyeji pia ilikuwa ndogo sana kulinganisha na ile ya Peramiho. Mapadre wazalendo wakati anatawazwa kama askofu wa Tanga walikuwa watatu tu. f). Siku za Mwanzo za Askofu Mteule Jimboni Tanga Baba askofu mteule aliwasili jimboni Tanga mwezi Januari 1970 kuweza kulifahamu Jimbo kabla ya kutawazwa kwake. Kwa mwezi wote uliofuatia aliweza kusafiri katika kila parokia ya jimbo na kukutana na mapadre na mabruda waliofanya kazi jimboni. Katika ziara hiy aliweza kukutana na masista pamoja na waumini wa jimbo. Zoezi hili lilimletea picha bora kwa wenyeji wake waliompenda kutokana na moyo wake wa ucheshi na upendo. Hivi hadi muda wa kutawazwa kwake ulipofika Machi 15, 1970, wana-Tanga wengi walikuwa wanamfahamu kwa kiasi kikubwa na walifurahia kuhudhuria sherehe yake za kutawazwa kule Chumbageni. Kuwa na askofu mzalendo katika Tanga haikuwa rahisi kuzoeleka kwa wana Jimbo la Tanga waliokuwa wamezoea kazi za wamisionari wazungu. Pamoja na ugeni wa wana-Tanga kuwa na kiongozi mzalendo, Askofu Maurus aliwasaidia sana wana-Tanga kujisikia karibu na uongozi huo kutokana na tabia yake ya uchakaramu, upendo, kushukuru, na kutambua vipaji vya watu. Alikuwa mtu wa upendo na shukurani. Kwa kweli alikuwa amejiandaa kuwatumia watu wa Mungu katika Jimbo la Tanga kwa upendo na ukweli. Alitanya kila jitihada ya kukutana na wanajimbo katika ngazi zote za Jimbo, parokia, na vigangoni. Alichukua nafasi ya kuzungumza na watu na kuwasikiliza kwa makini. g). Mang'amuzi ya Miaka Mitano ya Mwanzo ya Uaskofu Mang'amuzi haya yalimfanya baba askofu Maurus kuanza kufanya kampeni ya kina ya kupata miito ya mapadre na watawa ndani ya jimbo. Japo aliendelea kupata waseminari kutoka maparokiani, hakuridhika sana na mfumo wa kupeleka waseminaristi hapo kwenye seminari ya umoja wa majimbo kule Seminari ndogo ya Mtakatifu Petro Jimboni Morogoro. Baba askofu Maurus aliona kwamba nafasi ambazo tunapata kupeleka waseminari kule Morogoro ilikuwa ni finyu mno. Njaa ya kuwa na seminari ndogo ya jimbo ilikuwa kubwa mno ndani ya roho ya baba askofu. Binafsi alikuwa na mang'amuzi ya pekee ya ubora wa kuwa na seminari ndani jimbo. Katika jimbo lake la nyumbani kule Peramiho waliweza kupata miito mingi kwa kuwa na seminari ndogo ya Likonde na pia kuwa na seminari kubwa ya Peramiho. Vitalu hivyo vililea miito mingi na mizuri.
Njozi ya kuwa na seminari ndogo ya Jimbo la Tanga ilikuwa ukweli katika mwaka wa 1976. Katika mwaka wa 1974 Warosmini walimkabidhi baba Askofu Maurus majengo mazuri ya iliyokuwa shule yao ya kimataifa ya bweni kule Soni. Shule ile iliyofahamika kama shule ya Mtakatifu Mikaeli ilikuwa ikifundisha watoto wanaume wa kizungu na wa kiasia ambao wazazi wao walikuwa wakifanya kazi katika taasisi za kikoloni Afrika ya Mashariki. Kutokana na kupungua kwa wafanyakazi wa Kizungu na Kiasia katika Afrika Mashariki basi hata idadi ya watoto waliojiunga na shule ya Mtakatifu Mikaeli ilipungua na kuishinikiza. Hivi mara baada ya kupata majengo hayo, baba askofu alimtuma mheshimiwa padre Gerald Chilambo kukusanya vijana toka jimboni na kuanza seminari katika mwaka 1975. Japo baba Chilambo alipata vijana kadhaa katika mwaka huo hakuweza kuisajili seminari mwaka huo hadi ilipofika mwaka 1976. Kwa kuanzishwa kwa seminari ndogo ya Soni, vijana wengi toka maparokia yote ya jimbo waliweza kupata nafasi ya kujiunga katika malezi ya shule hii. Kwa msaada mkubwa wa masista na mapadre wa Jimbo la Tanga na pia kwa ukarimu mkubwa wa wamisionari walikuokuwa wanafanya kazi jimboni (Warosmini na Wabenediktini), seminari ilianza, ikakua, na ikazaa matunda. Kabla mhashamu baba askofu Maurus kustaafu uongozi wa Jimbo la Tanga, aliweza kupadirisha mapadre sita walioanza malezi yao ya awali katika seminari ya Soni. Mapadre hao ni John Mahundi (1985), Severine Yagaza (1986), Charles Mhina (1987), Laurent Mapunda (1987), Joseph Mbenna (1987), and Leopold Nyandwi (1987). Katika kipindi kizima cha uongozi wake, kipindi cha miaka 18, baba askofu Maurus Komba alipadirisha jumla ya mapadre wa jimbo 26. i). Miito ya Masista Wenyeji Katika safari zake za kichungaji maparokiani kote, baba askofu Maurus hakusinzia kuhimiza miito. Kwa moyo wake wote alishirikiana na uongozi wa masista wa jimbo COLU kuhimiza miito ya masista na ubora wao kimwili na kiroho. j). Ufunguzi wa Parokia Mpya k). Siku za Mwisho za Uongozi wa Askofu Maurus Afya ya mhashamu baba askofu Maurus Komba ilianza kuterereka katika mwaka wa 1983 wakati alipoanza kupata msaada wa matibabu ya ugonjwa wa moyo katika hospitali ya Litembo, wilayani Mbinga. Matatizo ya ugonjwa wa moyo hayakusimama kabisa katika mwaka huo. Matatizo haya yaliendelea na kupunguza mno nguvu ya utendaji wake wa kazi. Kwa nguvu na upendo wake wote aliokuwa nao kwa Jimbo la Tanga, baba askofu Maurus aliendelea kulihudumia Jimbo la Tanga hadi Vatikani ilipokubali ombi lake la kujiuzulu hapo Januari 18, 1988. Baada ya kujiuzulu kwake na baada ya kulikabidhi jimbo kwa askofu aliyemfuatia, baba askofu Maurusi alirudi Jimboni Mbinga kuishi maisha ya askofu mstaafu. Baba Maurus Komba aliishii hapo Mbinga hadi Februari 23, 1996 alipofariki dunia akiwa na umri wa miaka 73. Mwili wa Askofu Maurus Komba umezikwa kwenye Kanisa la Mtakatifu Aloisi Gonzaga, ambalo lililokuwa kanisa kuu la mwanzo la Jimbo la Mbinga kabla ya kuhamisha makao makuu ya Jimbo hilo kwenda kule yaliko sasa. ONGEZEKO LA PAROKIA CHINI YA UONGOZI WA MHASHAMU BABA ASKOFU MAURUS KOMBA 1970-1987 Kipindi hiki kilishuhudiwa na ongezeko la Parokia kumi: 1973 Kanisa la Bikira Maria Nyota ya Bahari-Pangani 1974 Kanisa la Bikira Maria Malkia na Mama-Hale 1976 Kanisa la Mtakatifu Paulo Wana wa Ibrahim- Handeni 1976 Kanisa la Mtakatifu Yosef Mume wa Bikira Maria -Magoma 1976 Kanisa la Mtakatifu Yosef Mfanyakazi-Sakharani 1976 Kanisa la Mtakatifu Teresia wa Mtoto Yesu-Malindi 1985 Kanisa la Bikira Maria Malkia wa Amani-Amani 1985 Kanisa la Mtakatifu Petro Mtume -Pongwe Saruji 1986 Kanisa la Watakatifu Gregori na Katarina-Kabuku 1986 Kanisa la Mtakatifu Yosef Mume wa Bikira Maria-Mombo B. MHASHAMU ASKOFU TELESPHORE MKUDE (1988 - 1993)
|
|
b). Miaka ya Mwanzo ya Askofu Mkude Tanga iii). Nyumba ya malezi Gare: Mwaka 1991 Askofu Mkude alinza nyumba ya malezi ya waseminari kule Gare kuweza kuwalea waseminari waliomaliza masomo ya sekondari na ambao walikuwa wanaelekea kwenye masomo ya filosofia. Alimteua mheshimiwa padre John Kika Zuakuu kuwa mkurugenzi wa kituo hicho. Baadaye kituo hiki kilihamia Shashui karibu na Soni Seminari.
e). Ufunguzi wa Parokia mpya f). Taasisi ya Afya
|
D: MHASHAMU ASKOFU ANTHONY BANZI (1994 - 2020)
c). Elimu ya Juu kwa Mapadre wa Jimbo Askofu Banzi amezibariki na kuhimiza elimu ya juu kwa mapadre wa jimbo kwa kuwapeleka masomoni mapadre hawa kwenye vyuo vikuu ndani na nje ya nchi. Mapadre kadha wa kadha wamesomo katika vyuo vikuu kule Nairobi Kenya, Italy, Austria, na Amerika ya Kaskazini. Kwa mapadre hawa kupata elimu ya juu kumewawezesha mapadre hao kufanya utume pekee ndani ya jimbo na hata nje ya jimbo la Tanga kwenye taasisi za kanisa kitaifa na kimataifa kama kule Chuo Kikuu cha Mtakatifu Augustino (SAUT) Mwanza, vyuo viandamizi vya SAUT, seminari kubwa nchini na hata AMECEA. d). Ujenzi wa Majengo ya Jimbo Baba askofu Banzi alianza ujenzi wa jengo la ofisi za kichungaji jimboni, jengo ambalo harakati zake za awali zilianzishwa na askofu aliyemtangulia. Kadhalika askofu Banzi amesimamia ujenzi wa jengo kubwa la Baba Mtakatifu Yohane Pauli II jengo ambalo limekuwa na huduma ya malazi na chakula kwa wageni wetu wafikao jimboni. Jengo hili linaiangalia Bahari ya Hindi. Pia baba askofu Banzi ameweza kupanua nyumba ya askofu kule Raskazoni kitu ambacho kimekuwa baraka kubwa kwa wageni wengi wafikao uaskofuni. Zaidi ya kupanua nyumba yake pia aliweza kupata jengo kubwa jirani ya makao yake kutoka Mamlaka ya Mkonge na ameweza kulifanya jengo hilo kuweza kukarimu wageni wetu wa jimbo. e). Kalenda ya Matukio Jimboni Kichungaji, baba askofu Banzi ameweza kuratibu kalenda ya matukio jimbo ambayo imekuwa ni msaada mkubwa kuratibu shughuli za kijimbo katika ngazi ya jimbo na pia katika ngazi ya parokia. f). Utume wa Masista Wenyeji Jimboni Toka afike jimboni Tanga askofu Banzi amekuwa bega kwa bega katika kulea miito ya masista wenyeji jimboni. Katika kipindi chake ameendelea kushirikiana na masista hawa na kuendelea kuwahimiza katika utume wao ndani ya kanisa la Tanga na kanisa la ulimwengu. Utume wa masista wa COLU umeendelea kupamba moto katika ngazi za shirikani, maparokiani, na hata katika majimbo mengi ya Tanzania. g). Utume wa Wamisionari Jimboni Baba askofu Banzi aliendelea kuzitambua na kuzikumbatia kazi njema ambazo mashirika yetu ya wamisionari yamekuwa yakizifanya ndani ya
jimbo la Tanga. Mapadre na mabruda katika shirika la Warosmini hivi sasa ni wenyeji wakati hapo walipofika mwanzo katika mwaka 1948 walikuwa wote ni
Wazungu. Warosmini hawa wamekuwa ni sehemu kubwa ya kazi ya uinjilishaji Jimboni Tanga. Hadi hivi sasa wanahudumia parokia zaidi ya sita jimboni
zikiwa ni parokia za Gare, Lushoto, Mombo, Kwalukonge, Kwai na Mtakatifu Petro Saruji. Askofu Banzi aliendelea kufanya kazi na mapadre na mabruda wa
Kibenediktini ambao hivi sasa wanahudumia parokia mbili za Soni na Mabughai. Askofu Banzi aliendelea kufanyakazi na mapadre wa Shirika la Roho Mtakatifu ambao
wana nyumba yao ya malezi kule Magamba Lushoto. Kadhalika aliendelea kuuezi utume wa dada zetu masista wa Damu Azizi ya Yesu ambao ni wakongwe katika Tanga
na kwa muda huu wapo kule Kifungilo na Lushoto. Baba Banzi alikuwa karibu kabisa na utume wa muda mrefu wa sista Karen wa shirika la masista wa Dada Wadogo
wa Mtakatifu Francis wa Asisi wa Mtakatifu Teresia wa Mtoto Yesu anayefanya utume kwa Wamasai kule Handeni. Baba Banzi aliweza
kuyakaribisha jimboni mashirika kadha ya kadha ya wamisionari. Aliwakaribisha mapadre wa Kazi za Roho Mtakatifu (ALCP/OSS) ambao hivi sasa wanafanya kazi
za kichungaji katika Parokia ya Kabuku. Aliendelea kuyakaribisha mashirika kadha kadha ya kitawa kuishi ndani ya Jimbo wakati yakitafuta njia za kujitegemea
na kuinjilisha. Hivi sasa tunao Wapashenisti ambao wana utume wa kilimo kule Zeneti, Muheza. Pamoja nao ni masista wa shirika la IVREA. Kule Mivumoni
Pangani wapo watawa wa Kifransiskani wakiwa na utume wa kilimo pia. Kule Pangani mjini masista wa Roho Mtakatifu kutoka Moshi wameweza kuanzisha nyumba ya
ukarimu. Masista wa Shirika la Mtakatifu Gema Galgani kutoka Dodoma wamefungua
nyumba yao ya kilimo kule Chang'ombe, Segera/Hale wakati masista wa shirika la Huruma ya Mungu nao wamefungua nyumba yao na shamba kule Mailikumi, Korogwe. Pamoja na mashirika hayo hapo juu, Baba Banzi aliwaalika masista wa Collegine kufanya utume ya malezi ya watoto wa mitaani kule kitongoji cha Bombo jijini Tanga. Pamoja nao bado tunao watawa wa Shirika la Roho Mtakatifu ambao wana nyumba yao ya unovisi kule Magamba Lushoto. h). Uinjilishaji na Teknologia Baba Banzi alikuwa mstari wa mbele kujizingirisha na uinjilishaji kutumia teknolojia zilizopo katika Karne ya 21. Katika muda wa uongozi wake amebariki na kusukuma kwa karibu sana uanzishwaji wa Radio Huruma ambayo inaendelea kuinjilisha jimbo zima. Aliweza kumwandaa mheshimiwa padre Richard Kimbwi kuweza kuongeza elimu ya kitaalamu katika uendeshaji na uhandisi wa radio hiyo. Pamoja na utume kwa njia ya radio, askofu Banzi pia alibariki na kusukuma kuwepo kwa tovuti ya jimbo ambayo ni kiungo kikubwa katika shughuli za kichungaji kwa wana-Tanga katika ulimwengu wa utandawazi. Hivi sasa Jimbo la Tanga linaweza kupatikana katika tovuti yake rasmi www.dioceseoftanga.org. i). Utume wa Makatekista Jimboni Baba askofu Banzi aliutambua sana utume wa makatekista katika kuliinjilisha Jimbo la Tanga hapo nyuma, sasa, na siku zote mbeleni. Kwa hali na mali baba askofu amewahimiza makatekista na pia kupigania haki zao na kuendelea kuboresha maandalizi ya kazi zao. Katika uongozi wake, kulikuwa na uongozi maridhawa wa kuangalia malezi ya makatekista kijimbo kimwili, kiroho, na kitaaluma. Baba Banzi aliiboresha sana Idara ya Katekesi Jimbo kuweza kujihusisha mno katika kujenga programu mahsusi kukuza elimu ya walimu hao wa dini. Kumekuwa na warsha kadha wa kadha ndani ya jimbo kuwaboresha makatekista. Baba Banzi alijenga chuo cha kusomesha makatekista pale Parokia ya Mlingano. Chuo hiki kilifunguliwa rasmi kwa baraka zake siku ya Jumamosi Machi 2, 2013. j). Ufunguzi wa Parokia Mpya Jimboni Toka alipoingia jimboni Tanga, Baba Banzi aliweza kufungua parokia mpya sita Parokia hizo ni zile za:
k). Upadirisho wa Mapadre wa Jimbo Toka atawazwe kuwa askofu wa Tanga katika mwaka 1994 hadi mwaka huu wa 2020, askofu Banzi aliweza kupadirisha mapadre 36 wa jimbo. Hiyo ni namba kubwa mno ya watendakazi katika shamba la mizabibu. Ni kutokana na baraka hii, basi mhashamu Banzi aliweza kuwa na uwezo wa kuweza kuwatuma baadhi ya mapadre wa jimbo kwenda kufanya elimu ya juu na pia kuweza kushiriki vyema katika kushiriki kuzijenga taasisi za Kanisa la Tanzania kwa kupeleka baadhi ya mapadre kufanya utume kule SAUT na seminari kubwa za umoja wa majimbo. l). Askofu wa Kwanza Mwana-Tanga Ni katika kipindi cha uongozi wa jimbo wa mhashamu askofu Anthony Bazi basi padre mwana Tanga aliteuliwa kuwa askofu. Hapo Jumamosi Februari 16, 2013 Vatikani ilimtangaza mheshimiwa padre Titus Joseph Mdoe, padre mzawa wa Jimbo la Tanga kuwa askofu msaidizi wa Jimbo Kuu la Dar-Es-Salaam. Hili limekuwa tukio la kihistoria katika jimbo la Tanga kwa kupata askofu mzawa toka jimbo hili liundwe hapo mwaka 1958. Askofu Mteule Mdoe ni mzawa wa Jimbo la Tanga toka Parokia ya Gare na alipadirishwa Juni 24, 1986 na kufanya kazi jimboni Tanga kama padre msaidizi, paroko, mkurugenzi wa miito jimbo, na pia mkurugenzi wa vijana jimbo. Hivi karibuni alitumwa kufanya utume katika Chuo Kikuu cha Kanisa Katoliki Tanzania cha Nyota ya Bahari kule Mtwara ambako alikuwa mtunza fedha. Ni katika nafasi hiyo basi aliitwa kuwa askofu msaidizi. m). 20.12.2020 Kifo cha Askofu Anthony Banzi wa Jimbo la Tanga Askofu Anthony Mathias Banzi alikuwa ni Padre wa Jimbo Katoliki la Morogoro. Alikuwa ni Askofu wa nne wa Jimbo Katoliki la Tanga. Alizaliwa tarehe 28.10.1946 huko Tawa, Morogoro. Alipata Daraja Takatifu la Upadre tarehe 29.07.1973 huko Jimboni Morogoro. Tarehe 10.06.1994, Baba Mtakatifu Yohane Paulo II alimteua kuwa Askofu wa Jimbo Katoliki la Tanga. Tarehe 15.09.1994 alisimikwa na kuwekwa Wakfu kuwa Askofu wa Jimbo Katoliki la Tanga katika Kanisa kuu la Mt. Anthony wa Padua Tanga. Tarehe 15.09.2019 aliadhimisha Jubilei yake ya miaka 25 ya Uaskofu katika Jimbo Katoliki la Tanga na hivi kuwa Askofu wa kwanza kutimiza 25 katika kulitumikia Jimbo la Tanga. Tarehe 20.12.2020, Askofu Anthony Banzi baada ya kuugua kwa muda kidogo aliitwa na Bwana akiwa anapatiwa matibabu katika hospitali ya Taifa ya Muhimbili, Jimbo Kuu la Dar es Salaam. Amezikwa katika Kanisa kuu la Mt. Anthony wa Padua akiwa pia ni Askofu wa kwanza kuzikwa katika Kanisa hilo la Jimbo. Amefariki akiwa na miaka 74 ya kuzaliwa, 47 ya Upadre na 26 ya Uaskofu.m). 07.06.2023 Padre Thomas Kiangio Ateuliwa kuwa Askofu wa Jimbo Katoliki Tanga Askofu Mteule Thomas John Kiangio alizaliwa 17.03.1965 katika Kijiji cha Mazinde Ngua, Kata ya Mazinde Ngua, katika Wilaya ya Korogwe katika Mkoa wa Tanga. Wazazi wake ni Baba John Mussa Kiangio na Mama Paulina Ally Suba. Mwaka 1975 hadi 1981, alipata Elimu ya Msingi Mazinde Ngua, Mazinde. Safari yake ya masomo na majiundo ya Kikasisi ilianzia seminari ndogo Mtakatifu Yosefu-Soni 1982 na baadaye Seminari Ndogo ya Mt. Petro iliyoko Jimbo Katoliki la Morogoro, kati ya Mwaka 1987 hadi mwaka 1989. Aliendelea na masomo ya Falsafa, Seminari Kuu ya Mt. Anthony, Ntungamo Jimbo Katoliki Bukoba kati ya mwaka 1989 hadi 1991. Aliendelea na masomo ya Taalimungu, Seminari Kuu ya Mt. Karol Lwanga, Segerea Jimbo Kuu la Dar Es Salaam kati ya mwaka 1991 hadi 1997. Mwaka 1994-95 alifanya mazoezi ya shughuli za Kichungaji katika Parokia ya Mlingano. Mwaka 1995, alipata mafunzo ya Afya ndani ya mwaka wa Kichungaji huko Bugando, Jimbo kuu la Mwanza. Alipata Daraja Takatifu la Ushemasi mnamo tarehe 01.01.1997, katika Kanisa Kuu la Anthony Tanga. Alipata Daraja Takatifu la Upadre 16.07.1997, Parokia ya Mama Bikira Maria Mama wa Mateso, Mazinde Ngua. Baada ya Upadrisho alihudumu katika nafasi na sehemu zifuatazo: Mwaka 1997 mpaka 1998, Paroko Msaidizi Parokia ya Ekaristi Takatifu, Lushoto. Mwaka 1998 mpaka 1999, Mlezi na Mwalimu na Gombera Msaidizi wa Seminari Ndogo ya Mt Yosefu Soni, Tanga.
1. SEHEMU YA KWANZA: KARNE YA 16 - 1947 2. SEHEMU YA PILI: 1948 - 1958 3. SEHEMU YA TATU: 1959 - 1969 |
