HISTORIA YA PAROKIA
Parokia ya Kabuku imejengwa kilometa kama tatu hivi mashariki ya mji mdogo wa Kabuku ambao umo pembezoni mwa barabara kuu inayounganisha njia za panda za Segera na Chalinze. Hapo mwanzoni Kabuku ilikuwa ni kigango cha Parokia ya Potwe. Mapadre toka parokiani Potwe walikuwa wanasafiri kufika Kabuku na vijiji vilivyozunguka Kabuku kutoa huduma za kichungaji.
Historia ya uwepo wa u-Katoliki katika nchi ya Kabuku inakwenda nyuma kwenye miaka ya 1965. Muda ule idadi ya wa-Katoliki ilikuwa ndogo sana. Kwa kuwa hakukuwa na jengo la kanisa katika kijiji cha Kabuku, mapadre waliofika hapo kwa huduma za kichungaji waliadhimisha liturjia chini ya mti. Kwa kuwa mapadre waliotoka Potwe hawakuweza kuwa na maskani yao katika Kabuku kwa wakati huo, makatekista wananchi walifanya kazi kubwa ya uinjilishaji katika sehemu hii. Historia inawakumbuka sana makatekista Peter Kimara na Peter Mivakuo ambao walifanya kazi kubwa ya kuisimika imani Katoliki katika sehemu hii.
Shule ya kwanza ya msingi ilijengwa katika nchi ya Kabuku katika mwaka wa 1967 kutoa huduma ya elimu kwa watoto wa wakazi wa maeneo haya ambao walikuwa wakiongezeka. Uwepo wa shule hii uliweza kutoa nafasi ya wak-Katoliki wa maeneo haya kufanyia ibada zao kwenye moja ya madarasa ya shule hii. Wakati Hale ilipotangazwa kuwa parokia inayojitegemea, kigango cha Kabuku kilihamia Parokia ya Hale na kuhudumiwa na mapadre toka parokiani hapo.
Katika mwaka 1974 chini ya uongozi wa mheshimiwa padre Ignatius Safari, kanisa dogo la muda lilijengwa Kabuku. Kukamilika kwa ujenzi wa kanisa hili dogo, liliifanya jumuia ya ki-Katoliki katika Kabuku kuwa na nyumba yao maalumu ya ibada.
Mpanuko wa wakazi katika nchi ya Kabuku na majirani zake yalisukuma uwepo wa parokia inayojitegemea katika maeneo hayo. Katika mwaka 1986 Mhashamu Baba Askofu Maurus Komba alimtuma mheshimiwa padre Nazzareno Natale, I.C. kuiandaa Kabuku kuwa parokia inayojitegemea. Kwa msaada mkubwa wa wafadhili kutoka katika nchi yake ya asili ya Italia, baba Nazzareno aliweza kujenga majengo kadha ya kadha hapo Kabuku ikiwa ni kanisa la kudumu, nyumba ya mapadre, nyumba ya masista na baadaye shule ya sekondari ambayo aliikabidhi kwa serikali kwa uendeshaji wake. Kadhalika aliweza kushiriki kikamilifu katika mradi wa maji ya bomba kwa ajili ya matumizi ya parokia na vijiji vya jirani ya parokia. Mhashamu Baba Askofu Telesphor Mkude aliweza kulibariki kanisa la Kabuku katika mwaka wa 1992 lilipokamilika na kuitangaza Kabuku kuwa parokia inayojitegemea.