HISTORIA YA PAROKIA
Parokia ya Kwediboma ipo ndani ya wilaya mpya ya Kilindi. Parokia ipo umbali wa kilometa 70 kusini-magharibi ya mji wa Handeni pembezoni mwa barabara kuu inayounganisha miji ya Handeni na mikoa ya Arusha na Dodoma.
Hapo awali Kwediboma ilikuwa ni moja ya vigango vya Parokia ya Mhonda katika jimbo la Morogoro. Parokia ya Mhonda ni moja ya parokia zilizoanzishwa na mapadre wa Shirika la Roho Mtakatifu waliosafiri wakitokea kwenye makao yao kule Bagamoyo. Wamisionari hawa waliweza kufika Kwediboma kwa huduma za kichungaji mara mbili kwa mwaka kutokana na umbali kati ya Mhonda na Kwediboma (kama kilometa 250).
Kwediboma haikuwa tu mbali na Mhonda lakini pia wenyeji wa maeneo hayo ambao ni wa-Zigua wengi wao walikuwa ni madhehebu ya ki-Isilamu. Upungufu wa ujio wa huduma za kichungaji katika nchi ya Kwediboma ulisitisha mpanuko au kukua kwa imani ya ki-Katoliki katika maeneo haya.
Ilikuwa baadaye sana ambapo wamisionari wa ki-Rosmini walifika katika Kwediboma na kuanza kujenga parokia. Katika mwaka 1950 mheshimiwa padre Eugen Arthurs, I.C. ambaye baadaye alikuwa askofu wa kwanza wa jimbo la Tanga akiwa na mheshimiwa padre Francis Kennedy, I.C. walifika Kwediboma na kufanya utafiti yakinifu wa kuanzisha parokia katika maeneo haya. Baada ya kupata majibu ya utafiti wao, waliona kwamba inawezekana kujenga parokia na mara walianza kujenga nyumba ya muda ya kuwawezesha kuishi mapadre. Baadaye uongozi wa shirika la ki-Rosmini liliwatuma waheshimiwa mapadre Daniel McCaul, I.C. na Michael Reen, I.C. kuwa mapadre wa kwanza wakazi wa parokia hii. Baada ya muda mfupi wa kuishi kwao pale, mapadre hawa waliweza kujenga nyumba ya kudumu kwa ajili ya mapadre. Jumuia hii ya mapadre ilipaswa kurudi kuishi kwenye nyumba yao ya asili hapo parokiani baada ya kupata ujio wa masista wa ki-Rosmini ambao walitumwa kufanya uchungaji hapo parokiani. Jumuia ya mapadre iliwapatia masista nyumba yao ili waishi.
Katika historia ya parokia ya Kwediboma masista wa ki-Rosmini wamefanya kazi kubwa ya kichungaji toka siku zao wa awali kufika hapo. Mara moja baada ya ujio wao, masista hawa walianzisha zahanati kwa ajili ya huduma za afya kwa wananchi wa hapa haswa kwa wamama wajawazito na watoto. Watu wa Kwediboma walipaswa kutembea umbali mrefu wa zaidi ya kilometa 70 kufika Handeni mjini kupata huduma hii ya afya. Wenyeji wengi wa maeneo haya ambao ni wa-Isilamu walifurahishwa mno na zawadi ya zahanati ambayo masista hawa waliileta katika nchi yao. Kingine ambacho kiliwafurahisha mno ilikuwa ni ari na uaminifu mkubwa wa masista hawa katika uboreshaji wa afya za wananchi wa mahali hapa na vitongoji jirani. Hali hiyo iliwafanya wananchi wengi wa maeneo haya kuupenda U-Kristu na kuwafanya wenyeji wengi kuupokea u-Kristu katika maisha yako. Wenyeji wengi wa muda mrefu katika nchi ya Kwediboma wanawakumbuka na kuzikumbuka kazi njema za kitume zilizofanywa na masista Laura, Vianney, Getrude na Francis ambao walijitoa mno kwa wagonjwa. Pamoja na masista hawa pia orodha nyingine ya masista ni akina sista Silvestra, Teresia, Rita Mektilde, Olimpia Alberta, Marisia, Emma, Renata na Juditha.
Katika mwaka 1956 mapadre wa-Rosmini walijenga shule ya bweni ya kati parokiani Kwediboma. Shule hii iliweza kutoa elimu ya juu ya kati kwa vijana wengi wakiume waliomaliza masomo ya shule za msingi za chini. Uhaba wa shule za ngazi hii ndani ya Kwediboma na hata sehemu nyingine jimboni na hata nje ya jimbo ulidunisha maendeleo ya elimu ya msingi kwa wavulana wengi wenye uwezo. Wengi wao waliishia safari yao ya elimu katika ngazi za chini za elimu ya msingi. Ufunguzi wa shule hii hapo Kwediboma ulikuwa ni ukombozi mkubwa kwa vijana wengi wa kiume na familia zao. Kwa kupata elimu ya ngazi hii ya kati, vijana wengi waliweza kuendelea na masomo yao ya sekondari. Vijana wengi waliofika kusoma shule ya kati ya bweni ya Kwediboma walifika hapo wakitokea sehemu mbalimbali nchini kama vile maparokia mengine jimboni hadi nchi ya Kilimanjaro. Shule hii ilikuwa ni kitivo chema cha elimu bora na pia chombo bora cha uinjilishaji ndani na nje ya jimbo. Mapadre wenyeji wa Tanga waliobahatika kupata elimu katika shule hii ni akina Martin Maganga and Severine Msemwa. Utaifishaji wa mashule wa mwaka 1969 uliiondoa shule hii toka mikononi mwa uongozi wa kanisa Katoliki na kuifanya shule ya serikali.
Rutuba katika nchi ya Kwediboma imeleta mwamko mkubwa katika shughuli za kilimo cha mazao mbalimbali na hivi kuwa kivutio cha wahamiaji wengi toka sehemu mbalimbali ndani na nje ya mkoa wa Tanga. Watu wengi wahamiaji wamefika katika nchi ya Kwediboma na vitongoji vyake kulima na kufuga wakitokea maeneo ya Lushoto, Arusha, Moshi, Same na Morogoro. Wahamiaji wengi waliofika hapa kutoka nchi ya Kilimanjaro walikuwa ni wa-Katoliki wenye mizizi mirefu ya imani ya ki-Kristu. Uwepo wao hapa umeleta chachu kubwa ya maisha ya ki-Kristu.

Hadi hivi sasa padre mzawa toka parokia hii ni: Paul Maulidi Shirima (2011).